Ashtu si pjesa tjetër e skuadrave të Superiores, Teuta ka rinisur përgatitjet për rifillimin e sezonit që parashikohet të ndodhë në datën 3 qershor.
Ashtu siç pritej pas rikthimit në stërvitje, te Teuta është rikthyer edhe entuziazmi, me lojtarët që tashmë mund të ushtrojnë profesionin e tyre. Pas përfundimit të seancës stërvitore, dy talentet e Teutës, Sherif Kallaku dhe Lorenco Vila, vendosën të argëtoheshin për pak, duke sfiduar njëri-tjetrin.
Dy të rinjtë sfiduan njëri-tjetrin për sa i përket ekzekutimit të penalltive por me një hile. Kështu lojtarët bënin disa rrotullime mbi topin dhe pasi ju ishin marrë mendtë, e gjuanin atë për të tentuar të shënonin.
Kallaku u tregua më i saktë, teksa në 2 gjuajtje arriti të shënonte 2 gola, ndërsa Vila shënoi vetëm një, teksa në një rast nuk po gjente dot as portën.
