Sulmuesi i Flamurtarit, Xhevahir Sukaj, është një emër mjaft i njohur në futbollin shqiptar, teksa ka shkëlqyer me Vllazninë dhe Partizanin.
Në një prononcim të dhënë së fundmi, sulmuesi shkodran, është shprehur se Flamurtari i tij ka kaluar një periudhë shumë të vështirë. 32-vjeçari gjithashtu ka rrëfyer pengjet që ka në karrierën e tij dhe arsyen se përse firmosi me skuadrën vlonjate.
Si është situata te Flamurtari?
“Te Flamurtari situata nuk ka qenë asnjëherë mirë, për faktin se e nisëm keq. Ka pasur probleme me pagesat. Mungesa e kualitetit në ekip ka treguar se jemi për të ardhur keq. I kemi respektuar të gjitha ndeshjet, pavarësisht se kush ekip ishte përballë. Pikërisht për këtë duhet të vlerësohemi, pasi një ekip tjetër nuk do e respektonte kështu kampionatin si në këtë gjendje.”
Pse vendosët t’i bashkoheshit Flamurtarit?
“Këtu më mori Batha, u bë ai shkak që unë kalova këtu. Pas rënies së Vllaznisë e përjetova shumë keq. Kur shkova te Flamurtari ishte për të mos thënë ekipi më i mirë në Shqipëri. Nëse nuk do kishte probleme me pagesat dhe largimet e lojtarëve, vitin e kaluar mund të ishim kampionë. Presidenti i klubit kërkon ligjin e sportit, pasi çdo gjë e ka nxjerrë nga xhepi i familjes së tij.”
Kush ka qenë më i mirë, Partizani juaj apo ky aktual?
“Partizani kur luaja unë, pa diskutim që ka qenë më i mirë se ky tani. Në 2015 dhe 2017 kanë qenë vitet më të mira, por Skënderbeu në ato vite ka qenë absolut dhe shumë lart. Partizani është një nga klubet më të paguara në Shqipëri dhe nuk e kuptoj pse janë në këtë gjendje.”
Keni ndonjë pishman nga karriera juaj si futbollist?
“Nëse më ka ngel një pishman në futboll është që nuk jam aktivizuar me Kombëtaren. Jam grumbulluar që 17 vjeç. Në kohën kur isha unë në Kombëtare kanë qenë disa lojtarë shumë shumë të mirë. Kur isha në Iran dhe isha në super formë dhe nuk u ftova nga De Biasi, e kam pishman shumë të madh. Ka pasur lojtarë të tjerë që nuk e kanë merituar dhe kanë luajtur. Kam pengun edhe të rrëzimit të Vllaznisë, por klubi u rrëzua nga rrethana të tjera.”- ka thënë ai për Supersport.
