Opozita nuk do të marrë pjesë në mbledhjen e Këshillit Politik, që pritet të mbahet sot.
Burime nga opozita shprehen se mospjesëmarrja në mbledhje nuk do të thotë bojkotim të procesit të reformës zgjedhore.
“Nuk do të marrim pjesë në mbledhjen e sotme, por nuk ka vendim për bojkot të procesit mbi reformën zgjedhore”, shprehen burime nga opozita.
Duket se vendimi ka ardhur pas dhunës së pashembullt që forcat speciale të policisë përdorën ditën e djeshme ndaj protestuesve, ndërsa në orët e para të mëngjesit të 17 majit, mësynë godinën e Teatrit Kombëtar, ndërsa në sallë ndodheshin rreth 50 qytetarë, artistë, shoqëri civile dhe ish-deputetë.
Paralelisht me këtë sulm, një fadromë goditi pjesën ballore të Teatrit Kombëtar, ndërsa në sallë ishin ende njerëz, duke rrezikuar jetën e tyre.
Aksioni vijoi me rrafshimin e godinës, ndërsa në bulevardin Dëshmorët e Kombit, u dhunuan qytetarë që protestonin.
E gjithë kjo situatë pasoi me takime të gjata të drejtuesve të partive opozitare, që sot do të mbështesin protestën e artistëve dhe aktorëve që për dy vite arritën të mbrojnë Teatrin Kombëtar.
