Mariya Gabriel, komisionere e BE për Inovacionin, Kërkimin, Kulturën, Edukimin, Rininë e Sportin, pozicionohet kudër qasjes së kryeministrit Edi Rama dhe kryebashkiakut të Tiranës Erion Veliaj për çështjen Teatrit Kombëtar.
Teksa Rama e Veliaj shprehen të bindur në të drejtën e vendimit se Teatri Kombëtar duhet shembur, kur zërat kundër, brenda e jashtë vendit kanë qenë të shumtë, Komisionerja Europiane bën thirrje për dialog të institucioneve me palët e interesuara për çështjen e TK.
“Dialogu me shoqërinë civile dhe ekspertët e trashëgimisë kulturore është i domosdoshëm përpara se të merrni një vendim të pakthyeshëm për Teatrit Kombëtar në Tiranë. Ne inkurajojmë fuqimisht të gjitha institucionet përkatëse që të përfshihen tani në një dialog konstruktiv me palët e interesuara”, shkruan Mariya Gabriel në një postim në Twitter.
Postimin e ka shpërndarë në faqen e tij në të njëjtin rrjet social edhe Presidenti Ilir Meta, i cili është shprehur po ashtu kundër shembjes së Teatrit Kombëtar. “Dëgjoni zërin e vërtetë të Europës”, shkruan Meta, duke iu referuar reagimit të Mariya Gabriel.
Një reagim pas deklaratës së komisioneres, erdhi dhe nga kryetari i PD, Lulzim Basha. “Faleminderit për mesazhet e qarta për respektimin e ligjit dhe thirrjen për dialog me artistët dhe ekspertët e trashëgimisë kulturore. Të ndalet menjëherë dhunimi i Kushtetutës & ligjit dhe provokimi për prishjen e paligjshme të TK”, shprehet ai.
