Ish-kryetari i LSI-së, Petrit Vasili u ka bërë ambasadorëve thirrje të reagojnë lidhur me çështjen e Teatrit Kombëtar, që kryeministri Edi Rama dhe kryebashkiaku i Tiranës, Erion Veliaj, duan ta shembin.
Në një reagim në FB, Vasili shpërndan reagimin e Fabian Topollaj, anëtar i Këshillit Bashkiak Tiranë, i cili denoncon se, vendimi për shembjen e Teatrit Kombëtar është miratuar në fshehtësi dhe jashtë agjendës së mbledhjes së Këshillit.
“Ambasadorë flisni sot, nesër nuk do t’ju dëgjojë më askush”, iu drejtohet Vasili ambasadorëve në vendin tonë.
“Ambasadorë ja ku e keni korrupsionin sa një mal, falsifikimin mafioz dhe dhunimin kriminal te ligjit nga qeveria e bashkia rilindase. Ambasadorë kjo është Drejtësia e Re që duartrokisni përditë? Ambasadore kjo është drejtësia e re, që mbron falsifikatorët dhe mashtruesit e qeverisë e të bashkisë rilindase? Ambasadorë po vidhet prona publike në mes të Tiranës! Ambasadorë po falsifikohen hapur dokumentat shtetërore! Ambasadorë po shkelet dhunshëm Kushtetuta! Ambasadorë keni folur sa keni dashur dhe për çdo gjë! Ambasadorë, Shqipërinë po e ha të gjallë Narkoshteti Rilindas dhe korrupsioni pandemik! Ambasadorë, shqiptarët për këto presin t’ju dëgjojnë që të flisni! Ambasadore flisni sot, se nesër nuk do t’ju dëgjoje e besojë më askush”, shprehet Vasili.
