Kitaristi Bledar Sejko, i njohur ndryshe si “Qepa” ka shprehur revoltën e tij, pas deklaratës së ministres së Financave, Anila Denaj se artistët, këngëtarët dhe profesionistët e këtij sektori duhet të angazhohen në sektorin e ndërtimit, pas krizës së krijuar nga koronavirusi.
“Qepa” thekson se këngëtarët dhe artistët s’janë profesionist të ndërtimit, ndaj propozimin e ka quajtur të pakuptimtë.
Sejko thekson se në rast se angazhohen persona jo të fushës në ndërtim, atëherë rreziku që një tërmet i radhës të shkaktojë dëme është shumë i lartë.
Por ministrja Denaj në një sqarim në rrjetet sociale ka përgënjeshtruar thënien e një deklarate të tillë.
“Të nderuar artistë të çdo fushe, që në çdo kohë na përcillni emocione.
Ju ftoj të dëgjoni të plotë deklaratën time si Ministre në emisionin e mëngjesit, të gazetarit Enkel Demi.
Duke shpresuar, që arti juaj të mos rreshtë kurrë së transmetuari në ambiente të hapura apo në platformat online, siç po ndodh sot në këtë kohë të COVID, mbetem me shpresën se komentet, që shtrembërojnë kontekstin nuk janë pjesë e kohës së humbur sot për asnjë nga ne”, shkruan Denaj.
Reagimi i Bledar Sejko
“Miq dhe mikesha artiste, muzikante, aktore, regjizore, kineaste, humoriste, valltare, sportiste etj etj se nuk ka fund lista e sektoreve te artit dhe kulturës, sektori ndërtimit ka nevoje për punëtorë, sipas kësaj i bie që:
Ne duhet te harrojmë profesionet, shkollat, studime, karrierën dhe një jete te tere nëpër skenat, brenda dhe jashtë vendit, ku me qindra artiste na kane nderuar neper skenat botërore, dhe qe fatkeqësisht disa janë kthyer qe te bëjnë artin ne atdheun e tyre, tani duhet te merren me ndërtime, dhe pastaj kur bie tërmeti radhes ( largqoftë) na bën me rrafsh se çfarë beri ky i nëntorit, se do futen jo profesioniste i bie ne fushën e ndërtimit.
Ahhh mortja që s’të ha dhe nuk ju ha, mjere populli e mjere ne që merremi me ju debila. No comment”, theksoi Sejko.
Reagimit të tij iu bashkua sot me ironi dhe këngëtari Elton Deda, i cili ka thënë se po e mendonte seriozisht të punonte në ndërtim, duke falënderuar ministren Dedaj.
