Policia e Korçës në bashkëpunim me atë të Durrësit kanë arrestuar tre persona, njëri prej tyre i shpallur në kërkim nga policia e Gjirokastrës, në kuadër të operacionit “Koordinimi”.
Ata akuzohen për dhënie ndihmë shtetasve të huaj, për kalim të paligjshëm të kufirit kundrejt fitimit.
Në pranga janë vënë shtetsait: I. H., 28 vjeç dhe A. L., 41 vjeç, banues në Durrës si dhe S. K., 31 vjeç, lindur në fshatin Pirg, Maliq, banues në Durrës. Për këtë të fundit Gjykata e Rrethit Gjyqësor Gjirokastër me vendimin e datës 23.01.2020, ka caktuar masën e sigurisë “Arrest në burg” për veprën penale “Ndihma për kalim të paligjshëm të kufijve”.
“Shtetasit e mësipërm, janë kapur në flagrancë nga shërbimet e policisë në afërsi të qytetit të Maliqit, duke transportuar me tre automjete në drejtim të Tiranës, 6 shtetas të huaj emigrantë të paligjshëm, të cilëve nga hetimet e kryera rezulton se iu kishin premtuar kalimin drejt vendeve të BE-së, kundrejt pagesës prej 150 euro secilit.” njofton policia.
Materialet në ngarkim të tyre i kaluan Prokurorisë pranë Gjykatës së Shkallës së Parë Korçë për veprën penale “Ndihma për kalim të paligjshëm të kufijve, kryer në bashkëpunim” e cila dënohet me burgim nga pesë deri në dhjetë vjet.
