Lajmi i mirë është se numri i viktimave dhe personave të infektuar me koronavirus në Itali po bie nga dita në ditë, ndërsa ai i të shëruarve po shtohet.
Ndërkohë që për këta të fundit një studim tregon se një numër i madh i tyre tani po vuajnë nga shëndeti i dobët, edhe pse ata e fituan betejën me virusin disa javë më parë. Personat e shëruar vuajnë nga lodhja e tepërt si edhe vështirësi në frymëmarrje.
Italia ishte ndër shtetet më të goditura në Europë ndërsa njihet si shteti i parë në kontinentin e Vjetër ku pas Kinës u identifikuan rastet e para.
Pandemia krijoi probleme në sistemin shëndetësor, që e pati të vështirë të mund ti bënte ballë fluksit të pacientëve, sidomos atyre të moshës së tretë.
Italianët e shëruar ankohen se edhe pse ata rezultojnë negativë e kanë të vështirë që të bëjnë xhiro, madje edhe në distancë të shkurtër, si edhe të punojnë. Në Itali, deri më tani kanë vdekur 30739 persona, ndërsa vendi ka nisur gradualisht hapjen.
