Megjithëse aktiviteti sportiv në disa liga të futbollit europian është ndalur, ajo që nuk ndalet janë përpjekjet e klubeve për të përforcuar skuadrat e tyre duke menduar për sezonin e ardhshëm.
Pavarësisht coronavirusit, aktualisht jemi në periudhën kur klubet ndërmarrin hapa gjigantë për të mbyllur transferimet ose shitjet e futbollistëve. Në këtë situatë është skuadra e Barcelonës që ashtu siç raporton “Mundo Deportivo” është në rrugën e duhur për të nënshkruar me dy futbollistë të profilit të lartë si, Lautaro Martínez dhe Miralem Pjanic.
Për kompletimin e këtyre transferimeve, ekziston një emërues i përbashkët që i bën negociuesit e Barçës optimistë. Të dy futbollistët sipas medias spanjolle janë të interesuar për të kaluar te gjigandi spanjoll.
Në “Camp Nou”, futbollisti argjentinas i Interit do të plotësonte jo vetëm një dëshirë të madhe, të luante përkrah Leo Messit, por do të përfitonte afro 10 milion euro në sezon, një pagë shumë herë më të madhe se sa ajo që përfiton aktualisht tek Inter, 3 milion euro.
Ndërsa nga ana tjetër për mesfushorin e Juventusit, Pjanic, dëshira për tu larguar ka lindur pasi në pjesën e dytë të sezonit ai nuk preferohej në skemat e Sarri-t dhe prej kohësh flitet për një largim të boshnjakut. Madje raportohet se midis dy klubeve, Juventusit dhe Barçës, është gjetur akordi ndërmjet tyre, sigurisht diskutimi mes palëve do të vazhdoj me “Zonjën e Vjetër” që kërkon shërbimet e brazilianit Arthur Melo në shkëmbim të Pjaniç.
