Eurodeputetja gjermane Doris Pack ka reaguar pas dhunës policore ndaj protestuesve dhe shoqërisë civile në Sheshin Skënderbej, në Ditën e Europës.
Në një postim në Twitter, Pack shkruan se akti i Ramës për t’ia kaluar truallin e Teatrit Kombëtar Bashkisë së Tiranës dhe aksioni brutal i policisë ndaj qytetarëve janë fytyra e vërtetë e premtimeve të tij në takimet evropiane.
Gjithashtu Pack ka reaguar edhe për vendimin ekstra-ligjor të Qeverisë që i kalon truallin e Teatrit Kombëtar, Bashkisë së Tiranës.
“Një shaka? Jo! në Ditën e Evropës, 9 maj, #Rama duke mosrespketuar vlerat europiane, po i lan duart e tij në mënyrë të pafajshme duke transferuar Teatrin Kombëtar, tek shoku i tij i ngushtë Veliaj kryetari i bashkisë së Tiranës, i cili do të shkatërrojë një ndërtesë të trashëgimisë kulturore me interes evropian“, shkruan Doris Pack.
Një ditë më parë një grup qytetarësh tentuan të protestojnë kundër masave ekstreme të vendosura nga Qeveria me pretendimin e mospërhapjes së Covid-19, por ato u dhunuan e u morën zvarrë nga policia.
