Në Komisionin e Sigurisë Kombëtare, u prezantua këtë të Premte projektligji “Për trajtimin financiar të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme, pas ndërprerjes së marrëdhënieve të punës”.
Ministri i Brendshëm Sandër Lleshaj sqaroi se punonjësit e Policisë, Gardës apo SHÇBA të cilët kanë 30 vjet në detyrë apo kanë mbushur moshën 55 vjet, do të kenë mundësi të largohen nga radhët e uniformave blu dhe do të përfitojnë një trajtim financiar. Pagesa do të jetë 50 përqind e pagës mujore neto që kanë marrë deri në momentin para përfshirjes në skemë.
Lleshaj tha se këta punonjës nuk do të konsiderohen si pensionistë dhe se nisma vjen me qëllim për të ulur moshën mesatarë në polici.
“Nuk konsiderohen persona në pension, ata mund të angazhohen në kuadër të programeve të ndryshme të policisë që shkojnë deri në 700 orë në vit, ndërkohë që koha normale e një shërbimit të një punonjësi policie varion nga 1500 1700 orë pune. Në shërim të policisë, jo në shërbime operacioneve të mirëfillta: Detyra të marrëdhënieve të policisë me komunitetin, fushata informimi, ndërgjegjësimi dhe të tjera si këto. Të arrijmë përmirësim të moshës së policisë pasi është ende më e larta në rajon. Çdo punonjës mund ti drejtohet komisionit nëse ka arritur disa parametra si psh gjendja fizike që mendon se pamundësojnë vijimin detyrës, ose mund ti drejtohet një drejtues i policisë”, deklaroi Lleshaj.
Ai shtoi se çdo vit do vlerësohet se sa persona do përfshihen në këtë skemë, në mënyrë që barra financiare të jetë e përballueshme nga Ministria e Brendshme.
Diskutimet
Në komision u tha se skema nuk duhet të përfshijë të gjithë punonjësit e Policisë, Gardës e SHCKB. Deputeti Vorpsi u shpreh se ata që punojnë në zyrë nuk ka pse të largohen nga këto struktura, pasi mund të japin eksperiencë të çmuar.
Ai kërkoi po ashtu që në skemë të përfshihen punonjësit e shërbimit zjarrfikës.
Lleshaj u shpreh dakord me propozimin për zjarrfikësit, ndërsa kërkoi një amendament nga deputetët në projektligjin aktual ose hartimin e një ndryshimi të ri ligjor të posaçëm për shërbimin zjarrfikës.
Ministri tha po ashtu se jo të gjithë punonjësit e policisë do të përfshihen në skemë, por vetëm ata që s’kanë mundësi të kryerjnë detyrën, duke nënkuptuar gjendjen fizike.
Një tjetër sugjerim ishte dhe që në rast se titullari i një institucioni policie bën një kërkesë për përfshirjen në skemë të një punonjësi, edhe ky i fundit duhet të bjerë dakord me propozimin, në mënyrë që të shmangen abuzimet. Relatorja e ligjit Antoneta Dhima tha se kërkesat në çdo rast shqyrtohen nga një komision i posaçëm që do ngrihet me vendim të Këshillit të Ministrave. Ndërkohë, Lleshaj tha se “nëse do abuzojë komisioni, atëherë do mbajë përgjegjësi”. Ministri tha se edhe në këtë moment mund të hiqen nga puna punonjës së policisë sepse kompetencat janë, ndaj dhe projektligji sipas tij, ka në thelb ndihmesën ndaj atyre punonjësve të cilët nuk kanë mundësi të vijojnë detyrën.
https://www.facebook.com/kuvendishqiperise/videos/1339909762861453/?v=1339909762861453
