Ndërsa UEFA ka vendosur afat 25 majin për të dorëzuar kalendarin duke ritheksuar se afati i fundit për përfundimin e sezonit është 2-3 gushti, qeveria shqiptare akoma nuk i është përgjigjur planeve të FSHF-së për të rifilluar kampionatin.
Kështu Federata Shqiptare, ka përgatitur edhe protokollin higjeno-sanitar dhe të sigurisë për futbollistët, stafet dhe mbarëvajtjen e parrezikshme ndaj infektimit të zhvillimit të ndeshjeve, protokoll ky që i është dërguar edhe institucioneve qeveritare si Ministrisë së Shëndetësisë dhe Sportit, por së fundmi siç deklaron Sekretari i FSHF-së, Ilir Shulku, qeveria nuk ka kthyer asnjë përgjigje.
Duke folur për Top Channel, Shulku ka thënë: “I kemi dërguar letër Ministrisë së Shëndetësisë dhe Sportit për t’u ulur në tavolinë dhe për të diskutuar por asnjë përgjigje deri tani”.
“Do ta quaja moskorrektësi dhe mungesë dëshire për të bashkëpunuar. Afati përfundimtar i UEFA-s për të mbyllur sezonin është 3 gushti, ndaj kemi 2 muaj për 10 javë kampionat dhe 5 ndeshje Kupe. Ministrja Manastirliu flet për Francën që u mbyll, por janë 55 federata dhe Gjermania e Mali i Zi do të rinisin. Le të na lejojnë të zhvillojmë profesionin tonë, nuk po i kërkojmë më shumë se sa kaq”.
