Mjekët e mjekësisë ligjore në Qendrën Universitare Hamburg-Eppendorf kanë fituar njohuri të reja mbi rrjedhën e sëmundjes Covid-19 pas analizës së viktimave.
Ata kanë ekzaminuar rreth 170 të vdekur nga korona gjatë javëve të kaluara.
Në një vlerësim të parë, 12 nga viktimat u ekzaminuan më në detaje. Shtatë prej tyre kishin trombozë dhe emboli pulmonare fatale.
Katër nga 12 pacientët vdiqën direkt nga embolia pulmonare- megjithëse nuk kishte dyshime para vdekjes së tyre.
Profesor Klaus Pueschel, drejtor i Institutit të Mjekësisë Ligjore, gjeti gjithashtu prova të embolisë pulmonare edhe gjatë autopsive të tjera në Hamburg.
Pueschel dhe kolegu i tij, profesor Stefan Kluge, drejtor i klinikës së kujdesit intensiv në UKE, e shohin këtë si konfirmim të terapive me ilaçe për hollimin e gjakut.
Kluge: “Tashmë kemi parë në praktikën e përditshme klinike që Covid-19 ka rezultuar në trombozë dhe emboli pulmonare të pacientët në një numër jashtëzakonisht të madh. Analiza e trupave të të ndjerëve e konfirmon këtë. Ne do e transferojmë këtë informacion të rëndësishëm në trajtimin e pacientëve me koronavirus”.
Studimi me të dhënat e autopsisë u botua në revistën ‘Annals of Internal Medicine’. Ai u rishikua nga katër ekspertë të pavarur para publikimit.
