“Cristiano Ronaldo ishte gjithmonë i destinuar për t’u bërë i madh”. Kështu thotë ish-shoku i skuadrës së portugezit te Manchester United, Louis Saha.
Sipas këtij të fundit, CR7 kishte treguar që 18 vjeç se ishte një gjeni. “Djajtë e Kuq” e rrëmbyen talentin e parakohshëm nga Sporting C.P. në verën e vitit 2003. Ish-sulmuesi i Manchester United, i cili u transferua në “Old Trafford” në janar, pas ardhjes së Ronaldos, i tha MUTV:
“Ai vazhdimisht u përmirësua, por do të thosha se parimet e tij si person nuk ndryshuan kurrë, ai ndiqte planin e tij. Gjatë gjithë karrierës së tij kemi parë të njëjtën përkushtim tek ai, sikur ishte 18 vjeç. Në fillimet e tij, ndoshta kishte më pak besim, pasi njerëzit po e sfidonin, ndërsa Ronaldo duhej të dëshmonte se ishte lojtari më i mirë”.
“Por, të kesh atë lloj besimi dhe urie për t’u stërvitur, për të punuar më shumë se të tjerët dhe për të qenë konsistent, pavarësisht se çfarë thonë njerëzit, kjo ishte thjesht një aftësi e mahnitshme e tij. Ishte më shumë se talent, sepse mënyra se si i analizonte gjërat në atë moshë nuk hasej te shumëkush. Mendonte vetëm si të rritej dhe të perfeksionohej cilësisht. Për mua ishte gjeni”.
“Të kesh vizion për të parë diçka më shumë, kur tashmë je te Manchester United, në moshën e tij, është vërtet e vështirë. Ai arriti ta bëjë këtë dhe kjo është arsyeja pse e respektoj aq shumë. Edhe pse ishte më i ri se unë, mbaj mend që më tha: Louis, duhet të buzëqeshësh më shumë kur luan. Në fakt, kishte të drejtë…”
