Ish-futbollisti i Kombëtares së Shqipërisë, Fatmir Vata, ka deklaruar se Kombëtarja në kohën kur luante ai ka qenë më e mirë se ajo aktualja.
Në një prononcim për “FanZone” 48-vjeçari ka folur edhe për foton e famshme me Oliver Khan si dhe për përplasjen që ka pasur me Brigelin.
Shqipëria e kohës së Vatës: “Po ta marrim si emra, ekipi i asaj kohe ka qenë më i mirë. Me De Biasin edhe ekipi ynë do të bënte po kaq mirë. Kam patur rastin të flisja edhe me De Biasin dhe më ka bërë përshtypje. Për mendimin tim, Shqipëria e atyre viteve ishte më e mirë, por janë shumë komponentë të tjerë të rëndësishëm që ndikojnë, siç është trajneri. Ndeshjen e parë me Shqipërinë e kam luajtur në vitin 1996 me trajner Neptun Bajkon, miqësore me Greqinë”.
Fotoja epike me Oliver Kahn: “Shumë shqiptarë janë ndier krenarë për këtë foto. Ka qenë në vitin 2005 fotoja më e mirë sportive. Ishte e goditur. Fotografi që e ka realizuar nuk jeton më. Skela bëri një goditje në portë, unë shkova mora topin e çova te vija e pesëmetërshit, ndërsa dëgjova të gjithë stadiumin që po bërtiste. Kur ktheva kokën, pashë Oliver Kahn. Ma kanë dërguar më vonë foton dhe tani e kuptoj që ka më shumë vlerë”.
Përplasja me Brigelin: “Kam luajtur 17 ndeshje me Kombëtaren, një far faji e kam edhe vetë për përplasjen me Brigelin. Ishte e kotë, më shumë dola unë i humbur. Në shqiptarët jemi ballkanas, gjaknxehtë. Do të kisha shumë dëshirë që lojtarët e Kombëtares së sotme të jepnin maksimumin në fushë, kur të vishet fanella e Kombëtares të jepet maksimumi i maksimumit”.
