Futbolli në Gjermani është gati për të rinisur. Mediat atje bëjnë të ditur se midis qeverisë gjermane dhe federatës së futbollit është rënë dakord që gjithçka të rinisë më 15 maj.
Por ky plan që akoma nuk është zyrtarizuar nga Kancelarja gjermane, Angela Merkel, mund të vihet në dyshim pasi është regjistruar një rast i ri me coronavirus.
Kështu klubi gjerman, Erzgebirge Aue që militon në Bundesliga 2, ka njoftuar se një pjesëtar i klubit është infektuar me virusin famëkeq dhe për pasojë e gjithë skuadra është vendosur në karantinë.
Duke folur për të përditshmen gjermane “Bild”, drejtori i Erzgebirge Aue, Michael Voigt tha: “Vala e dytë e testeve të kryera të hënën në mëngjes, na konfirmoi një rezultat pozitiv me Covid-19 për një nga anëtarët e ekipit”.
Tanimë seancat stërvitore për klubin janë ndërprerë dhe situata për Bundesligën 2 dhe futbollin gjerman në tërësi komplikohet.
