Ministrja e Infrastrukturës dhe Transportit, Belinda Balluku, tha mbrëmjen e sotme në Opinion se me riatdhesimet ka një lehtësim, duke shpjeguar se banorët e zonave të gjelbra shkojnë karantinohen në hotele, ndërsa ata që janë zonat e kuqe do të karantinohen në shtëpi.
Balluku tha se nga SHBA kanë kërkuar të riatdhesohen 256 persona, shumica e të cilëve janë të kontaktuar për tu kthyer ose janë kthyer.
Ministrja tha se në vende ku ka akses Turkish Airlines do të operohet për të bërë të mundur kthimin e tyre në Stamboll dhe më pas transportimin me Air Albania drejt Tiranës.
Balluku tha se ndoshta kufinjtë, lidhur me udhëtimet me linjat ajrore, mund të hapen në shtator, por ky vendim nuk varet nga Shqipëria por nga vendet e tjera.
Lidhur me mosfunksionimin e Portit të Vlorës, Balluku theksoi se shpreson që ai të rihapet në datën 18 maj.
“Duke filluar nga dita kur janë marrë masat, gjithçka u vendos që për arsye sigurie të funksiononte vetëm Porti i Durrësit”, sqaroi Balluku.
Ajo tha se nesër pritet të riatdhesohen shqiptarët që ndodhen në Maltë.
