Mjekët e skuadrës së Barcelonës ngrejnë alarmin. Sipas gazetës spanjolle “AS” në skuadrën e Barcelonës ekziston një shqetësim i madh për shëndetin e lojtarëve.
Kësaj radhe nuk bëhet fjalë për coronavirusin, por për rrezikun e lartë të dëmtimeve nëse aktiviteti futbollistik rifillon pas 2 muajsh pezullimi. Siç bëhet e ditur nga raporti i mjekëve të skuadrës katalanase, parashikimet më optimiste janë që në muajin e parë pas rikthimit skuadrat mund të kenë rreth 5-10 dëmtime.
Ekzistojnë disa arsye për të mbështetur një parashikim të tillë pesimist; një periudhë dy mujore izolimi ka ulur ndeshëm përgatitjen fizike të lojtarëve, ndërsa gjatë kësaj kohe për shkak të protokollit të vendosur nga shtetet e ndryshme, mundësia për tu stërvitur ka qenë shumë e kufizuar.
Gjithashtu një faktor tjetër që pritet të ndikojë negativisht te futbollistët, është koha e shkurtër në dispozicion për tu rikuperuar pas një ndeshjeje ku zhvillimi i tyre do të ndodhë çdo 72 orë.
