Mesfushori shqiptar i Hajdukut të Splitit, Françesko Tahiraj, në një intervistë të fundit ka folur për eksperiencën te skuadra kroate dhe ëndrrën për t’u rikthyer një ditë te Juventusi, klub ku u formua si futbollist.
23-vjeçari gjithashtu duke folur për emisonin “FanZone” në Supersport, deklaroi se Kombëtarja e Shqipërisë i dërgoi atij ftesën për sfidat ndaj San Marinos dhe Sllovenisë por pandemia e coronavirusit i prishi ëndrrat e tij për të debutuar për vendin e tij.
Si e ke kaluar këtë periudhë? A i keni rinisur përgatitjet?
Nuk ka qenë aspak e thjeshtë kjo periudhë, pasi ishte diçka e panjohur për ne, por për fat të mirë kemi rinisur stërvitjen prej gati 3 javësh. Fillimisht stërviteshim në mënyrë individuale, ndërsa këtë javë kemi filluar me grupe me nga 5 lojtarë.
E ndjeni peshën e një klubi kaq të madh si Hajduku i Splitit?
Përgjegjësia është e madhe, pasi është një klub me emër dhe tifozeri të jashtëzakonshme, që pret gjithmonë rezultate pozitive. Megjithatë me mentalitetin e duhur mund të shkojmë përpara.
A do të donit të riktheheshit një ditë te Juventusi?
Unë jam rritur në Torino dhe Juventusi është skuadra ime e zemrës, jam rritur atje qoftë si futbollist e qoftë si njeri, ndaj do të doja të rikthehesha sërish një ditë.
E prisni një ftesë nga Kombëtarja Shqiptare?
Fatmirësisht ftesa më erdhi për miqësoret me San Marinon dhe Slloveninë, por korona na prishi planet. Besoj se shumë shpejt do të jem pjesë e Shqipërisë, por kjo do të varet nga unë dhe mënyra si do të paraqitem në vijimësi.
