Erion Piciri, është një nga deputetët e asaj që konsiderohet opozita e re. Ai mori mandatin e deputetit më 19 prill të 2019, pasi më parë ligjvënësit e PD i kishin dorëzuar në grup.
Në atë kohë, pra më 19 prill, sapo KQZ e mandatoi si ligjvënës, Piciri do të deklaronte se nuk do të merrete rrogën e deputetit. Madje në një postim në rrjet, ai do të shkruante se do të bënte punën si deputet në mënyrë vullnetare.
“Këto para duhet të mbeten në buxhetin e shtetit dhe të paguhen rrogat mujore të ish-deputeteve që ikën nga parlamenti dhe i kanë kërkuar këto pagesa ekstra”, shprehet ndër të tjera Piciri.
Më tej, ai shprehet se nuk e konsideron veten deputet, por vetëm një intelektual, zëdhënës publik në parlament.
“Do vijoj me mësimdhënien sipas parashikimeve ligjore. Auditori një kënaqësi, kuvendi një sakrificë”, shkruante Piciri.
Një vit më pas, më 30 prill 2020, në një seancë plenare, Piciri propozoi që që të ulen në masën 30% pagat e deputetëve, duke përfshirë dietat, shpërblimet, karburantin dhe shërbimin e telefonit, duke e lidhur këtë me krizën e krijuar nga koronavirusi dhe tërmeti i 26 nëntorit.
Piciri madje deklaroi se paga e tij si deputet nga muaji prill i 2020 deri në fund të mandatit të mbetej në fondin shtetëror.
Kjo do të thotë se nga momenti që ka marrë mandatin, prill 2019 deri në prill 2020 ai ka marrë pagën si deputet dhe gjithë përfitimet që i takojnë bazuar në statusin e deputetit. Dhe mirë ka bërë, përsa kohë pranoi mandatin.
Pyetja që lind është pse pikërisht deputeti i opozitës së re zgjedh muajin prill për të deklaruar se heq dorë nga paga. Nëse do të vazhdojë sërisht funksionin ky parlament, pritet që edhe në prillin e 2021 deputeti të deklarojë heqjen dorë nga paga, dhe kjo mund të jetë e treta e vërteta.
