Përditësuar/ Gjykata e Durrësit vendosi sot masën e sigurisë ‘arrest me burg’ për dy autorët e 4 vrasjeve në Durrës, në përputhje me kërkesn e prokurorisë.
Avokati i Altin Ndocit, Saimir Visha deklaroi në një prononcim për mediat pas seancës se klienti i tij nuk ka gisht në asnjë nga dy krimet për të cilat akuzohet. Visha tha se 33-vjeçari ka pasur marrëdhënie miqësore me viktimat e vrasjes së pak ditëve më parë në Durrës (vëllezërit Haxhia) si dhe disa familjarë të tyre. Ai po ashtu deklaroi se klienti i tij nuk ka asnjë lidhje me vrasjen në Mars në Durrës, ndërsa shtoi se prokuroria nuk solli në seancë prova, që implikojë klientin e tij.
Avokati u shpreh po ashtu se Ndoci nuk e njeh të akuzuarin tjetër për dy vrasjet: Klevis Alla, për të cilën është raportuar se ka bashkëpunuar me hetuesit.
……
Ora 9:10 – Akuza për 4 vrasje, prokuroria kërkon arrest me burg për dy të dyshuarit
Mbërrijnë në gjykatën e shkallës së parë në Durrës dy autorët e dyshyar të vrasjes së 4 të rinjve. Altin Ndoci dhe 22-vjeçari Klevis Alla, në shoqërimin e forcave të shumta dhe masave të rrepta të sigurisë janë futur në gjykatë. Prokurori i cështjes është Gëzim Veizi, ndërsa gjyqtare Eda Kaja.
Prokuroria ka kërkuar masën e sigurisë arrest me burg pa afat për të dyshyarit.
Ata akuzohen për vrasje në bashkëpunim të Besmir e Viktor Haxhisë disa ditë më parë dhe Dorjan Shkozës e Anxhelo Avdisë, në muajin shkurt. “Nga hetimet e kryera dhe këqyrja e vendit të ngjarjes rezulton se mekanizmi i kryerjes së krimit në të dyja ngjarjet është i ngjashëm dhe shkaku dyshohet të jetë prishja e pazareve për aktivitetin kriminal”, njoftoi dje policia.
E kaluara e viktimave dhe autorëve nuk ka qenë e panjohur për policinë, pasi kanë qenë kapur dhe dënuar më parë për drogë. 2 nga 4 viktimat kanë qenë të dënuar për trafik narkotikësh, konkretisht Dorjan Shkoza 35 vjeç, që u vra në 2 mars, ka qenë ish i dënuar me 8 vjet burg për drogë dhe Besmir Haxhia që u vra në 27 prill, ishte dënuar në Greqi dhe Francë po për narkotikë. Gjithashtu edhe njëri nga autorët e dyshyar, pra Altin Ndoci ka qenë i dënuar më parë për drogë.
Lexo edhe:
Vrasja e dy vëllezërve në Durrës/ Arrestohen dy autorët e dyshuar (VIDEO)
