Jose Mourinho në vitin 2012 ishte pranë fitimit të Ligës së Kampioneve me skuadrën e Realit të Madridit, pasi kishin një skuadër të fortë dhe kishin mbërritur deri në gjysmëfinale.
Planet e portugezit, u prishën nga Bayern Munich, skuadër e cila i eliminoi pas dy takimeve ku vendimtare ishin 11-metërshat. Pasi humbën ndeshjen e parë 2-1, “Los Blancos” arritën ta vendosnin situatën në barazpeshë, brenda mureve të “Bernabeu” me anë të një dopiete nga Cristiano Ronaldo, por iu desh të dorëzoheshin në “ruletën” e penalltive për shkak të gabimeve të Ronaldo-s, Kaka dhe Sergio Ramos.
Duke folur për “Marca”, Mourinho ka treguar se ajo humbje ishte e vetmja për të cilën ka qarë në karrierën e tij, pasi sipas tij atë sezon Reali ishte skuadra më e mirë në Europë.
“Ajo natë është hera e vetme kur kam qarë pas një ndeshjeje futbolli. E kujtoj mirë, unë dhe Aitor Karanka parkuam para shtëpisë time duke qarë. Ishte shumë e vështirë për të pranuar humbjen sepse në sezonin 2011-2012 ishim skuadra më e mirë në Europë”.
