“Five Eyes”, inteligjenca e 5 shteteve, SHBA, Mbretëria e Bashkuar, Kanada, Zelanda e Re dhe Australia, akuzon Kinën se ka mbajtur të fshehta informacionet lidhur me koronavirusin dhe nuk pranoi të ndihmojë shtetet e tjera për të përgatitur një vaksinë.
Dokumenti prej 15-faqesh, i publikuar nga mediat ndërkombëtare, hedh dritë mbi qëndrimin e mbajtur nga Kina.
Në dokument pretendohet se përballë “rrezikut nga vendet e tjera”, Qeveria kineze mbuloi lajmin për virusin duke heshtur ose “zhdukur” mjekët që flisnin për rrezikun nga COVID-19, duke shkatërruar provat e virusit në laborator dhe duke refuzuar të sigurojë mostra të gjalla për shkencëtarët ndërkombëtarë që punonin në një vaksinë.
Përmes raportit, Five Eyes, rendit një seri akuzash ndaj Kinës, që nisin me mohimin vdekjeprurës të transmetimit midis qenieve njerëzore, “zhdukjen” e mjekëve dhe shkencëtarëve që folën për koronavirusin, shkatërrimin e provave të virusit nga laboratorët e studimeve gjenomike dhe pastrimi i tregut ku shiteshin kafshët e egra.
Gjithashtu Kina akuzohet se mbajti të fshehtë informacionin mbi transportuesit asimptomatikë të sëmundjes.
“Pekini kishte mohuar “transmetimin e virusit nga njeriu te njeriu” në fazat e hershme të shpërthimit në Wuhan. Në fakt, zbulohet se Kina kishte “prova të transmetimit nga njeriu në njeri që nga fillimi i dhjetorit”, por vazhdoi të mohojë se mund të përhapet në këtë mënyrë deri në 20 janar”, thuhet në dokumentin e publikuar.
Në vijim hidhen dyshime mbi rolin e OBSH, ku sipas raportit të Five Eyes, pranoi këto pretendime nga Pekini pa diskutuar, madje edhe kur Tajvani dhe Hong Kongu shprehën shqetësimin mbi transmetimin.
Raporti gjithashtu pretendon se ka gjetur prova se virusi kishte origjinën në Institutin e Virologjisë Wuhan, afër tregut të lagësht nga i cili Kina thotë se vjen virusi.
