Ish-mbrojtësi i Manchester United, Mikael Silvestre, ka deklaruar se Ronaldo “fenomeni’ është futbollisti më i mirë që ka parë ndonjëherë duke injoruar kështu ish-shokun e tij të skuadrës te Man.United, Cristiano Ronaldo dhe Lionel Messin.
Duke folur për faqen zyrtare të “Djajve të Kuq”, francezi lartësoi brazilianin duke e quajtur të pandalshëm, ndërsa lojën e CR7-s ai e cilësoi si të parashikueshme dhe të mangut.
“Fenomeni Ishte i pandalshëm. Kam luajtur kundër Messit dhe së bashku me Cristianon, por ai kishte diçka ndryshe, për sa i përket shpejtësisë. Ishte në nivelin më të lartë të mundshëm”.
“Cristiano ka tri, ose katër stile loje, që shpesh i përdor dhe ju mund t’i studioni. Ronnie ishte ndryshe. Ai ishte i paparashikueshëm, nuk mund ta kuptoje nëse do të shkonte majtas apo djathtas. Shënonte nga të gjitha pozicionet. Në disa momente të karrierës së tij luajti me një këmbë dhe në çdo rast i mposhti të gjithë mbrojtësit më të mirë në Europë”.
