Lidhur me vendimin e ministrisë së Arsimit për rihapjen e universiteteve dhe kthimit të studentëve në auditore sipas datave të dhëna, ka ardhur një reagim nga akademiku Artan Fuga.
Në një postim në rrjetet sociale, Fuga shfaqet kritik ndaj ministres Besa Shahini, ku sipas tij ky është një vendim i pakonsultuar dhe i papërgjegjshëm që vulos tradhëtinë e madhe të shtetit ndaj rinisë studentore, arsimin universitar, shkencës, pedagogëve, intelektualëve dhe artistëve.
Akademiku Fuga i drejton dhe tre pyetje ministres Shahini.
Postimi i Artan Fugës:
Me vendimin e pabazuar, e pakonsultuar, e papërgjegjshëm të hapjes të universiteteve pavarësisht gjendjes të pandemisë vrastare, Besa Shahini vulosi atë tradhëti të madhe që shteti u ka bërë rinisë studentore, arsimin universitar, shkencësh në Shqipëri, pedagogëve dhe përgjithësisht intelektualëve dhe artistëve!
Pyetja ime është : E ka llogaritur sesa prej tyre mund të vdesin nëse ky vendim vihet në jetë pa pasur parasysh gjendjen virusologjike të vendit?
Pyetja ime është : A ka rektor dhe dekan që do të kishte guximin të merrte përsipër këtë vrasje të mundëshme masive duke pretenduar që do të kishte marrë masat sanitare, higjenike, dizenfektuese, sikurse ja u lë “kopilin në derë” ministria e arsimit?
Pyetja ime është : Nëse kjo ndodh, a nuk do të ishte një vrasje masive e paralajmëruar që do të duhej të parashikohej kështu në kodin penal si përgjegjësi e administratorit publik për shëndetin publik?
