Ndërkohë që qeveria italiane, FIGC dhe Seria A po punojnë për rifillimin e sezonit, ekziston edhe mundësia që kampionati Italian, ta ketë luajtur ndeshjen e fundit për këtë sezon.
Kështu “La Gazetta dello Sport”, sjell një skenar për mënyrën se si do të procedohej nëse sezoni i Serie A do të anulohej.
Nëse kampionati mbyllet këtu, atëherë në Europë do të shkojnë 6 ekipet e para të renditura në tabelën e klasifikimit. 4 të parat në Champions dhe vendi i 5-të dhe i 6-të në Europa League.
Juventus, Lazio, Inter dhe Atalanta në Champions, ndërsa Roma dhe Napoli në Europa League. Mbetet vetëm të përcaktohet ekipi i 7-të, skuadra e tretë që do të shkojë në Europa League, pasi Verona ka një ndeshje më pak se Milani.
Në këtë variant, këtë sezon nuk do të akordohet titulli kampion, Juventus nuk do të mund të shijoj një titull në tavolinë pavarësisht se është kryesues.
Nuk do të ketë rënie nga kategoria, ndërsa sezoni 2020-2021 parashikohet të zhvillohet me 22 ekipe. Grupit aktual pritet t’i bashkohen dy ekipet e para në klasifikim në Serie B deri në këtë pikë të sezonit.
Të gjitha këto në kuadrin e hipotezës, pasi ende nuk ka një vendim zyrtar për fatet e sezonit.
