Një ditë më parë, qyteti i Durrësit u trondit nga vrasja e dyfishtë e dy vëllezërve Besmir dhe Viktor Haxhia në zonën e tregut të makinave.
Viktimat po udhëtonin në të njëjtin automjet kur autorë ende të paidentifikuar ju ngritën kurth dhe i ekzekutuan në vend.
Breshëria e plumbave bëri shoshë makinën e tyre ndërsa janë dëmtuar edhe mjete të tjera aty pranë.
Roja e parkingut ka treguar për gazetarin Aldo Mustafa momentet kur dëgjoi te shtënat me breshëri gjatë ekzekutimit të dy vëllezërve.
“Saktësisht, 3 karikatorë 32-sha po e po, u zbrazën, po mos më shumë. Ne u tronditëm dhe u shtrimë barkas. Unë pashë vetëm një makinë që po kalonte andej (tregon me dorë) dhe dy veta i shkonin nga pas. Makina ikte ngadalë, kurse ata të dy shpejtonin të arrinin makinën”, thotë ai.
Lidhur me ngjarjen janë sekuestruar kamerat e sigurisë pranë vendit te ekzekutimit të vëllezërve Haxhia dhe dyshohet që autorët kanë përdorur një makine tip “Toyota Yaris”, ngjyre gri për të kryer vrasjen.
Grupi hetimor ka sekuestruar edhe aparatet celulare të të dy viktimave për te parë kontaktet që ata kanë pasur se fundmi. Ndërkaq hetimet krahas disa pistave, vijojnë te jenë te përqendruara te larja e hesapeve për çështje borxhesh. /DurresLajm/
