Një vrasje e dyfishtë ka ndodhur në Lezhë, ndërsa policia ka nisur hetimet për zbardhjen e ngjarjes.
Nga të dhënat e para u raportua se dy shtetas janë gjetur të pajetë në fshatin Lalm i Vjetër, ndërsa më parë ishin dëgjuar të shtëna armësh.
Viktimat janë identifikuar si Preng Simoni dhe Kol Murrani, të dy të moshës 60 vjeç.
Njëri prej viktimave, Kol Murrani është i njohur në zonën e tij për këngët dhe zërin melodioz.
E ndërsa nuk dihen motivet mbi ngjarjen e rëndë, policia mësohet se ka shoqeruar disa persona që mund të kenë dijeni për krimin.
Nga të dhënat mësohet se autorë të ngjarjes kanë qenë më shumë se dy persona, ndërsa ndaj viktimave është qëlluar me dy tipe armësh, pistoletë dhe automatik. Për shkak të terrenit të thyer ku ndodhet fshati Lalm i Vjetër, një zonë e thellë malore, autorët kanë mundur të largohen pa u identifikuar.
Mësohet se policia është njoftuar për krimin e dyfishtë nga njëri prej të afërmve të viktimave, ndërsa vrasja mendohet se ka ndodhur rreth mesditës.
