Lautaro Martinez nuk do ta kishte të garantuar vendin e titullarit te skuadra e Barcelonës dhe për pasojë karriera e tij duhet të vazhdojë tek Interi.
Kështu është shprehur trajneri legjendar italian, Fabio Capello, i cili beson se nën drejtimin e Antonio Contes në “San Siro”, argjentinasi do të zhvillohej më tepër si futbollist. Duke folur për Gazzetta dello Sport, ai ka thënë:
“Nëse do të isha në vendin e tij, do të qëndroja te Interi, pasi te Barcelona thjesht do të ishte një zëvendësues. Ai është një lojtari I ri që ka nevojë për të mësuar sa më shumë. Mendoj se te Interi mundësitë për të zhvilluar aftësitë e tij janë më të mëdha se te Barcelona. Duket që nën drejtimin e Contes, ai po shkëlqen, nuk do ta ndryshoja këtë gjë”.
