Ikona e Serie A, Jose Altafini, e ka quajtur sulmuesin e Interit, Lautaro Martinez, një lojtar cilësor por deklaroi se ai nuk është një “fenomen”.
Barcelona është duke bërë përpjekje të vazhdueshme ta blejë Martinezin si pasues afatgjatë të Luis Suarezit, por Altafini druhet se argjentinasi është duke u mbivlerësuar shumë nga mediat.
“Ai është një lojtar i mirë por jo një fenomen. Vetëm Ronaldinho, Braziliani Ronaldo, Messi dhe Neymar mund të konsiderohen fenomene.
“Ai është një lojtar i shkëlqyeshëm por jo në të njëjtën kategori me këta lojtarë.”
81-vjeçari u pyet edhe për mundësinë që sezoni aktual duhet të rifillojë në kohën e pandemisë koronavirusit.
“Nuk mund ta ndalësh Serinë A tani. Duhet të rifillosh, pavarësisht se në korrik, gusht apo shtator”, – ka thënë ai për “Mundo Deportivo”.
Ish-sulmuesi, Jose Altafini, karrierën e tij e ka kaluar në Serinë A, duke luajtur për disa nga skuadrat më të mëdha si Milani, Napoli dhe Juventusi. Ai është katër herë fituesi i Serie A (1958-1959,1961-1962) me kuqezinjtë dhe (1972–1973, 1974–1975) me Juventusin.
