Kurba e ecurisë së koronavirusit në Shqipëri është e pazakontë dhe nuk ka lidhje me asnjë prej modeleve që i janë referuar më parë ekspertët e Shëndetit Publik.
Një kurbë e sheshtë, ku hera herës shfaqen raste që konsiderohen si piku, ndërsa një apo dy ditë më pas, rastet zyrtare të raportuara janë disa herë më pak.
Ndryshimi i kurbës së të prekurve me Covid-19 sipas mjekëve infeksionistë diktohet nga disa faktorë.
Doktor Tritan Kalo thotë se dy janë arsyet që në Shqipëri kanë përcaktuar mbajtjen nën kontroll të situatës.
“Numri i rasteve pozitive ka të bëjë me disa faktorë. Së pari, shtrirjen e testimeve në vatrat e reja të personave të kontaktit ose të rrethit të parë ose të dytë, ka të bëjë me numrin e përgjithshëm të testimeve, pozitivitetin e tyre. Si rregull në botë nga numri i përgjithshëm i testimeve pozitiviteti varion midis 8 dhe 12 %. Ne jemi afërsisht tek 11%, duke pasur parasysh totalin e 7409 testimeve dhe pozitive deri më sot kanë rezultuar 7306.”
Efiçencën e rasteve që rezultojnë pozitiv në popullatë mjeku Kalo thotë se e përcaktojnë dy elementë të rëndësishëm. Ai thotë se aktualisht vendi ynë është në shifra relativisht të ulëta, ç’ka ka çuar në mirëmenaxhimin e situatës nga bluzat e bardha.
“Shtimi i numrit të shtrimeve në spital dhe mbi të gjitha shtimi i të sëmurëve që trajtohen në terapi intensive. Fatmirësisht numri i të shtruarve në spital është në shifra relativisht të ulëta dhe numri i të trajtuarve me terapi intensive kurrë si ka kapërcyer kapacitetet këtyre reparteve në vlerën 50-60% të tyre, çka e bën të mundshme të mirëmenaxhohen rastet e ardhura në spital”, tha Kalo për TvKlan.
Sipas doktor Kalos, evolucioni i rasteve nga 8 marsi kur u shënua edhe i prekuri i parë me Covid-19 në vendin tonë ka qenë një kurbë në formë M-je.
Mjeku infeksionist sqaron se për pasjen e kësaj kurbe në nivele mirëmenaxhuese u deshën masat shtrënguese dhe kufizimi i lëvizjes së popullsisë.
