Shqipëria vijon të jetë e karantinuar, por është tronditur ditën e sotme, nga krimi.
Dy atentate me katër viktima në Lezhë dhe Durrës, në harkun e dy orëve. Për ta bërë edhe më tragjike ditën e sotme janë edhe dy vetëvarje në Elbasan dhe Përrenjas.
VRASJET NË LEZHË
Preng Simoni dhe Kolë Murrani janë dy personat që janë vrarë me armë zjarri, në fshatin Lalm i Vjetër në Lezhë. Ata u gjetën të pajetë.
Dy 60-vjeçarët dyshohet se janë qëlluar me kallashnikov, nga një distancë jo shumë e largët.
Preng Simoni dhe Kolë Murrani, nuk rezultojnë persona me precedentë të mëparshëm.
Njëri prej viktimave, Murrani, është një rapsod i njohur për zonë.
ATENTATI NË DURRËS
Atentat i dyfishtë në Durrës ndaj dy vellëzërve, Viktor dhe Besmir Haxhia. Ata janë me origjinë nga Puka, por me banim në Spitallë të Durrësit. Atentati ndodhi rreth orës 16:40, tek vendi i quajtur “tregu i makinave”, Shënvlash, në rrethana ende të paqarta. Ata u ekzektuan me armë zjarri brenda një automjeti tip “Volkswagen”, me të cilin po udhëtonin.
Dy pistat që po dyshohet për vrasjen kanë të bëjnë të dyja me Besmir Haxhian.
Pista e parë që po hetohet, është borxhi, kurse e dyta ndonjë konflikt biznesi për shkak se Besmir Haxhiu kishte kompani karrotreci. Ndërsa Viktor Haxhia ishte avokat në Durrës.
Policia është vënë menjëherë në lëvizje për të shoqëruar të dyshuarit dhe persona që mund të kenë dijeni për ngjarjen.
Dy prej të shoqëruarve u janë vënë dhe prangat, kurse tjetri është shoqëruar pa pranga.
Në ndihmë të Policisë Vendore janë edhe Forcat Speciale Renea dhe Forcat e Ndërhyrjes së Shpejtë të Tiranës.
