Presidenti i Republikës, Ilir Meta, ka qenë i ftuar në emisionin “Në fokus” në “Tv T”, ku është pyetur rreth aludimeve, se mes tij dhe kryeministrit Edi Rama, ka një marrëveshje të fshehtë.
Meta shpjegoi se dekretimi i ndryshimeve në Kodin Penal, ka qenë një veprim i motivuar, nga nevoja për të evituar abuzimet me të drejtat e njeriut dhe se veprimet e tij duhen gjykuar nga “mendje të ftohta” dhe persona që nuk vuajnë nga “paragjykime të nxehta”.
“Unë marrëveshjet i kam me zë dhe me të gjithë qytetarët e Shqipërisë. Aktet dhe veprimet e mia kanë qenë publike, si për qëndrimin tim publik drejtuar Kuvendit, përpara se të miratonte këto ndryshimt. Si më pas, kur unë kam dekretuar ndryshimet në Kodin Penal dhe kam bërë të qarta se cilat kanë qenë motivet, por edhe se si duhet të punohet për të zbatuar këto dispozita të Kodit Penal, në mënyrë që të mos ketë abuzime me të drejtat e njeriut. Apo, qoftë edhe gjatë ditës së sotme, ku i jam drejtuar të gjithë institucioneve përgjegjëse, që t’i përgatisin sa më shpejt, udhëzimet e tyre, për zbatimin e drejt të Kodit Penal, në terern. Gjithçka ka qenë e hapur dhe mund të vlerësohet me mendje të ftohtë, nga të gjithë ata, të cilët, nuk vuajnë nga paragjykime të nxehta”, tha Meta.
