Për shkak të coronavirusit, futbolli evropian ndodhet në një gjendje amullie dhe e ardhmja nuk është e qartë. Nga organet qeverisëse të futbollit ka pasur disa skenare të ndryshme për mënyrën se si do të përfundojnë sezonet e kampionateve të ndryshme.
Kështu në bazë të vendimeve të zbardhura nga mbledhja e zhvilluar dje në bordin e UEFA-s, një nga skenarët, i konsideruar edhe si më ekstremi, është ai i quajtur si “futbolli 3-ditor”.
Në bazë të një skenari të tillë, nga “Gazzetta dello Sport” deri të “Daily Mail” bëjnë me dije se UEFA ka kërkuar që gjithçka të përfundojë deri më 3 gusht. Me të drejtë, gjithkush mund ta vërë në dyshim nëse kampionatet në Europë do të kenë mundësinë kohore për të përfunduar deri në këtë datë. Këtu, UEFA ka sanksionuar edhe skenarin ekstrem.
Nëse futbolli shqiptar nuk do të nxjerrë verdiktet përfundimtare deri në datën 3 gusht, pra që të saktësojë ekipet që shkojnë në Europë nëpërmjet kampionatit dhe ekipin fitues të Kupës së Shqipërisë, atëherë në kompeticionet europiane ekipet do të shkojnë në bazë të renditjes së UEFA-s bazuar në koeficientet e klubeve. Në bazë të kësaj, Tirana është do të ishte e humbura më e madhe në Shqipëri.
Në bazë të kësaj renditjeje, bardheblutë gjenden në vend të 378- të, e cila për nga renditja e ekipeve shqiptare është në vend të shtatë. I pari në këtë listë është Skënderbeu, i renditur i 182-ti, por me shtrëngimin që ka për të mos luajtur në Europë i bie të lërë vendin për ndjekëset. Në radhë renditen Kukësi (198), Partizani (241), Laçi (321), Teuta (374), Luftëtari (377) dhe Tirana (378).
