Takimi mes Ministrit të Sporteve Vincenzo Spadafora, kreut të Federatës Italiane të Futbollit (FIGC) Gabriele Gravina, kreut të Komisionit Mjekësor, Paolo Zeppilli dhe përfaqësuesve të ligave të Serisë A, B dhe atyre më të ulëta ka përfunduar.
Takimi zgjati rreth 2 orë dhe u zhvillua në formën e një video-konference. Në takim është diskutuar protokolli i propozuar nga Komisioni Mjekësor pranë federatës italiane që do të ndiqet nga të gjithë klubet për të shmangur përhapjen e koronavirusit në kohën kur të nisin seancat stërvitore.
Ministri i Sporteve, Spadafora, pas mbledhjes deklaroi se një datë konkrete për fillimin e seancave stërvitore në Itali, do të dalë në ditët në vijim, shoqëruar kjo edhe me planin përkatës me rregullat që do të ndiqen.
“Falënderoj të gjithë pjesëmarrësit në takim. Unë dëgjova me vëmendje të madhe pozicionet e ndryshme që dolën nga takimi dhe në ditët në vijim, pas një diskutimi me Ministrin e Shëndetësisë dhe Komitetin Shkencor Teknik, do të nxjerrim dispozitat azhurnuar mbi mundësinë dhe modalitetet për rifillimin e seancave stërvitore”.
