Masat shtrënguese për lëvizjen e mjeteve dhe këmbësorëve si pasojë e pandemisë kanë ulur numrin e aksidenteve rrugore në vend.
Megjithatë, në muajin mars 10 persona raportohet se kanë humbur jetën në 65 aksidente.
Javën e dytë të marsit qeveria vendosi të kufizojë lëvizjen e mjeteve dhe këmbësorëve për të parandaluar përhapjen e COVID-19, e mesa duket ky vendim ka ndikuar për të ulur edhe numrin e aksidenteve rrugore.
Sipas të dhënave që publikon INSTAT, numri i të aksidentuarve gjatë muajit të kaluar krahasuar me një vit më parë është ulur me 46,6%. Megjithatë edhe pse gjatë marsit, për gati 3 javë vendi ishte në shtetrrethim, nuk kanë munguar aksidentet me pasoja të rënda duke regjistruar 10 viktima.
Po sipas INSTAT në gati 80% të rasteve aksidentet rrugore kanë ndodhur si pasojë e sjelljes së drejtuesit të mjetit ndërsa 2 këmbësorë kanë humbur jetën. Ulja e numrit të aksidenteve gjatë marsit rrjedhimisht ka ndikuar edhe në përmirësimin e statistikave 3 mujore, ndërsa në fillim të vitit kur ende nuk ishte shfaqur pandemia, ministria e brendshme e shpalli 2020-ën vitin e sigurisë rrugore duke lançuar edhe disa nisma për ndërhyrje të forta në kodin rrugor për të rritur gjobat për disa shkelje të cilësuara problematike nga policia rrugore.
