“Bota nuk do të jetë më si më parë. Kemi shumë rrugë për të bërë dhe është e qartë që virusi do të jetë me ne shumë gjatë”.
Janë këto fjalët e drejtorit të përgjithshëm të Organizatës Botërore të Shëndetësisë, Tedros Adhanom Ghebreyesus, gjatë një konference për shtyp në Gjenevë këtë të mërkurë.
“Nuk ka dyshime që mbyllja dhe masat e izolimit social kanë ndikuar në frenimin e përhapjes. Por virusi mbetet ekstremisht i rrezikshëm dhe pjesa më e madhe e popullsisë do të mbetet e ndjeshme ndaj ngjitjes. Nuk është momenti për të ulur vigjilencën, pasi rreziku i rifillimit të përhapjes së Covid-19 është shumë i lartë”, tha ai.
Sa i takon nisjes së fazës 2, OBSH deklaron se bota duhet të përshtatet me një normalitet të ri, pasi për rinisjen nuk ekziston një qasje e njëjtë për të gjithë.
“Nuk mund të themi se cilat masa mund të hiqen dhe ku. Duhet të jetë vetë vendi në nivel lokal ai që të vlerësojë një sërë faktorësh dhe të konstatojë se ku virusi është nën kontroll para se të vendosë”, deklaroi Ghebreyesus.
Deri më tani në të gjithë botën numri i viktimave nga koronavirusi ka shkuar në 181.569, ndërsa i të infektuarve në 2.606.614, teksa aktualisht të shtruar në spital ndodhen 712.326 persona.
