“Shqipëria është prej dhjetorit në gjendje të jashtëzakonshme. Shtyrja është më shumë si një procedurë, vazhdimësi e situatës. Nuk mendoj se kemi më shumë shkelje dhe më shumë kufizime. Problem është se do të duhet të kishte edhe një vullnet për të zbatuar parimet e situatës së jashtëzakonshme, siç ndodhi edhe me ndryshimet në Kodin Penal”.
Kështu e komentoi zgjatjen e fatkeqësisë natyrore edhe për dy muaj analisti, Afrim Krasniqi në A2. Ai sugjeron që në situatën aktuale ku ndodhet vendi të ngrihet një komision parlamentar për të ndjekur të gjitha aktet e mazhorancës.
“Shqipëria është një vend i varfër me një mijë probleme. Në këtë këndvështrim nuk kemi të bëjmë me një situatë që rrezikon të drejtat e qytetarëve, por një situatë që vendos shtetin në punë, por që në këtë rast mund ta vendosë në vështirësi atë. Unë po shoh alarmante situatën që qeveria nuk ka një strategji se çfarë do të ndodhë në vazhdim, me ekonominë dhe jo vetëm. Për këto, parlamenti do të duhej të luante një rol. Unë do të sugjeroja që të krijohej një komision parlamentar që të ndiqte të gjitha aktet e mazhorancës, por që deri tani nuk është bërë. Kjo ndodh në çdo parlament normal. Në këtë situatë, ne kemi vetëm zërin e kryeministrit dhe kjo rrezikon se situata mund të përdoret për politikën e ditës.
Teza e mazhorancës është që në situatë të jashtëzakonshme merren masa të jashtëzakonshme, kjo është një tezë që nuk ka lidhje me demokracinë. Nëse i referohemi këtyre pikave, ka një sërë veprimesh që duhet të ndërmerreshin nga qeveria. Të gjitha tenderat kanë nevojë për sqarim, se në ditën më të vështirë të shqiptarëve, ku po shkojnë paratë e tyre, kur një pjesë e tyre nuk kanë as minimumin jetik. Do të duhet të kishte një mekanizëm të garancisë dhe të monitorimit”, u shpreh Krasniqi.
Analisti komentoi edhe nismën për amnisti fiskale, duke theksuar se rrezikohet që të futet para edhe nga “historia e famshme e kanabisit” në vendin tonë.
“Gjithmonë amnistitë kanë pasur dy qëllime, nevoja e qeverisë për të mbledhur para dhe nevoja për të legalizuar para që vijnë nga burime informale, në rastin më të mirë. Në të kaluarën nuk ka pasur sukses. Risku është se në emër të amnistisë, ne mund të fusim kapitalin kriminal, ose që mund të ketë ardhur nga historia e famshme e kanabisit në Shqipëri. Një qeverisje e mirë i edukon qytetarët se kush është korrekt me ligjin respektohet, ndërsa kjo nismë bën të kundërtën. Kjo lloj diskordance përbën një risk. Mund të mos jetë mesazhi i duhuri, ne duhet të kemi mekanizma për ta monitoruar këtë. Janë një sërë hallkash që nuk janë konsumuar. Shqipëria ka nevojë për para, por kjo mund t’i kthehet edhe si bumerang”.
/A2News.com
