LSI, përmes zv.kryetarit Luan Rama, bëri të ditur se sot ka përfunduar ligjërisht, referuar Kushtetutës, afati i shpalljes së “Gjendjes së Fatkeqësisë Natyrore”.
Rama tha se kjo do të thotë që në këtë kontekst kushtetues ligjor, duke iu referuar edhe situatës konkrete, faktike të gjendjes në të cilën është popullsia në Republikën e Shqipërisë, në raport me epideminë e pandemisë së Coronavirus, rezulton se propozimi i qeverisë për të shtyrë dhe dy muaj të tjetër shpalljen e “Gjendjes së Fatkeqësisë Natyrore“ të jetë tërësisht flagrant dhe në kundërshtim me Kushtetutën, i pambështetur, i pamotivuar dhe i paarsyetuar, jo vetëm nhga pikëpamja kushtetuese dhe ligjore, por edhe nga realiteti faktik.
“Sot nuk ka më asnjë bazë reale, por edhe asnjë bazë kushtetuese dhe ligjore që të zgjatet më tej gjendja e fatkeqësisë natyrore, aq më tepër po të kemi parasysh që ka zona të tëra të vendit, ka bashki të tëra në të cilat nuk ka asnjë rast ta shfaqjes së të infektuarve me coronavirus, gjë që do të thotë se nuk ka asnjë arsye as në kuptimin parandaluese, por as në kuptimin e diagnostikimit, as në kuptimin e administrimit te realitetit që atje të ketë kufizime në kuadër të shpalljes së gjendjes së fatkeqësisë natyrore”, tha Rama.
LSI i bëri thirrje Qeverisë që të tërhiqet menjëherë nga ideja apo propozimi për zgjatjen e gjendjes së fatkeqësisë natyrore në Republikën e Shqipërisë edhe me 2 muaj të tjerë.
Gjithashtu, LSI i kërkon Qeverisë që nesër, menjëherë pas përfundimit edhe në kuptimin kushtetues dhe ligjor të gjendjes së fatkeqësisë natyrore, duhet që të rikthej menjëherë, me status të plotë Shqipërinë si anëtare të Këshillit të Europës dhe siç urdhëron neni 5 i Konventës Ndërkombëtare për të Drejtat e Njeriut.
“Pavarësisht që në kuptimin kushtetues dhe ligjor, Shqipëria është në kushtet e fatkeqësisë natyrore, masat e aplikuara nga qeveria janë në tejkalim të kësaj gjendjeje apo të këtij statusi ligjor pasi ato realisht kanë qenë masat e gjendjes së jashtëzakonshme, gjë që do të thotë se jemi përpara dhunimit, shpërdorimit dhe shkeljes flagrante të Kushtetutës.
Për asnjë motiv politik dhe për asnjë arsye korruptive që mund të fshihet prapa kësaj situate nuk duhet lejuar që Shqiëpria të ecë më tej dhe 2 muaj të tjerë në kushtet e gjendjes së fatkeqësisë natyrore në kuptimin formal, ligjor dhe kushtetues.”, tha Rama.
