Është arrestuar nga policia 36-vjeçari i cili pasditen e sotme plagosi me mjet prerës infermieren e Qendrës Shëndetësore Arrëz. Menjëherë pasi plagosi infermieren, i riu është larguar nga banesa, por u arrestua nga policia jo shumë larg vendngjarjes.
Infermierja A.T., kishte shkuar në banesën e A.M., për ti bërë gjilpërën nënës së këtij të fundit. Ende nuk dihen shkaqet e sulmit.
A.T., ndodhet në spital ku po merr ndihmë mjekësore jashtë rrezikut për jetën.
Njoftimi i policisë:
Lushnjë
Policia kap dhe arreston në kohë rekord autorin e plagosjes me thikë të infermieres së qëndrës shëndetësore në fshatin Arrëz.
Sot, rreth orës 19:15, në fshatin Arrëz, Lushnjë, shtetasi A. M., 36 vjeç, ka goditur me mjet prerës (thikë), shtetasen A. T., 59 vjeçe, infermiere në qëndrën shëndetësore në fshatin Arrëz, e cila kishte shkuar në banesën e autorit për t’i bërë gjilpërën nënës së tij të sëmurë.
Pasi ka goditur infermieren, shtetasi A. M. është larguar nga banesa, por pas reagimit të menjëhershëm të Policisë u kap dhe u arrestua në flagrancë, në tentativë për t’u larguar nga vendngjarja.
Shtetasja A. T. ndodhet në spitalin e Lushnjës, nën kujdesin e mjekëve, jashtë rrezikut për jetën.
Grupi hetimor po punon për zbardhjen e plotë të kësaj ngjarjeje.
