Rritet në 609 numri i të prekurve nga koronavirusi në vend, me 25 raste të reja në 24 orët e fundit në Kurbin dhe Krujë. Shifra konfirmohet nga Ministria e Shëndetësisë në komunikimin ditor. Sipas të njëjtave burime, 345 prej të infektuar janë shëruar, ndërsa betejën me këtë sëmundje e kanë humbur 26 vetë. Sipas llogaritjeve, 238 persona rezultojnë të infektuar. Në dy spitalet COVID janë 40 të shtruar.
Sot është dita e parë që nga fillimi i epidemisë që Tirana nuk ka rast të ri.
Shifrat
Në një deklartaë për mediat, Albana Fico nga Instituti i Shëndetit Publik, informoi:
“Në 24 orët që lamë pas rezultatet e situatës epidemiologjike janë si më poshtë: Janë testuar 242 persona të dyshuar me COVID-19. Nga rezultatet e testimeve janë konfirmuar 25 raste pozitive me COVID19. Vijon hetimi epidemiolog jik dhe gjurmimi i kontakteve në Krujë ku kanë rezultuar pozitivë 17 persona dhe në Kurbin ku kemi 8 raste të reja. Sot është dita e parë që nga fillimi i epidemisë që Tirana nuk ka asnjë rast të ri. Deri në këto momente janë testuar 6017 raste të dyshuara dhe prej tyre janë të konfirmuar pozitivë me COVID-19, 609 raste.
Gjatë 24 orëve të fundit, 18 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 345. Aktualisht në vendin tonë janë 238 persona të infektuar aktivë dhe siç shihet numri i të shëruarve është më i lartë. Kjo tendencë tashmë vazhdon pa luhatje prej më shumë se një jave. Deri sot, 26 qytetarë e kanë humbur betejën me këtë sëmundje megjithë përpjekjet e stafit mjekësor.
Ju informojmë se, në shërbimin infektiv aktualisht janë 32 të shtruar. 5 pacientë janë në terapi intensive. Në spitalin COVID 2 ‘Shefqet Ndroqi’, janë 8 pacientë të shtruar. 5 pacientë janë në terapi intensive në gjendje të rënduar, ndërsa 3 pacientë janë në pavion. Në dy spitalet COVID aktualisht po marrin shërbim 40 pacientë”.
Harta e të prekurve
Harta e të prekurve nga COVID-19 zgjerohet në Kurbin e Krujë:
– Tiranë 253 raste
– Durrës 42 raste
– Lushnje 6 raste
– Elbasan 16 raste
– Fier 36 raste
– Kavajë 9 raste
– Rrogozhinë 4 raste
– Korçë 19 raste
– Vlorë 5 raste
– Shkodër 99 raste
– Lezhë 14 raste
– Berat 2 raste
– Has 13 raste
– Krujë 40 raste
-Tropojë 4 raste
– Pukë 5 raste
– Mirditë 3 raste
– Kukës 11 rast
-Mallakastër 1 raste
– Kurbin 27 raste
60 bluza të bardha dhe 21 fëmijë të prekur
E pyetur lidhur me numrin e bluzave të bardha të infektuar, Fico bëri me dije se nga COVID janë prekur 60 mjekë dhe infermierë, nga të cilët dy të tretat janë të shëruar. Numri i grave shtatzëna të prekur është katër, 2 prej të cilave janë shënuar, shtoi. Fico tha se 21 fëmijë janë infektuar nga koronavirusi, gjysma e të cilëve është shëruar.
“S’kemi asnjë fëmijë të shtruar në spital”. “Nga forcat e policisë rezultojnë 14 të prekur, deklaroi, dhe në strukturën akomoduese shtetërore të Ministrisë së Mbrojtjes, janë 4 persona”.
Ajo bëri me dije se ka 1 gazetar të infektuar, i vetëizoluar i cili është në gjendje të mirë dhe po monitorohet nga mjeku i familjes, ashtu si gjithë rastet që trajtohen në banesa.
Apeli
“Pavarësisht luhatjesve në numrat ditorë të zbulimit të bartësve të virusit apo të sëmurëve prej tij, situata është e kontrolluar. Treguesi i vërtetë është numri i të shtruarve në spitale, që vazhdon të mbetet në shifra të qëndrueshme. Në mënyrë që situata të vazhdojë të jetë e kontrolluar, është e rëndësishme që qytetarët të respektojnë masat e distancimit fizik, si e vetmja mënyrë e kufizimit të përhapjes së infeksionit. Këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye. Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40”, apeloi Albana Fico.
