Rrëfehet Adolfo Sormani. Trajneri i Partizanit në një lidhje live me emisionin Fan Zone në Supersport foli për shumë tema që përfshinë aktualitetin e kuq.
Ai shpjegoi arsyet e rikthimit te Partizani, objektivat e skuadrës në këtë sezon, ndërsa shtoi se nuk i trembet largimit. Sormani e krahasoi Shqipërinë dhe më konkretisht Tiranën me qytetin e vendlindjes së tij Napolin
“Është një emergjencë botërore dhe po e përjetojmë shumë keq të gjithë. Jemi munduar të bëjmë diçka edhe online për stërvitjen, por nuk është e njëjtë siç mund të bëhet në fushë. Do të presim një vendim se kur është momenti që ne do të kthehemi në fushë”.
“Ndërprerja e kampionatit? “Është një pyetje që unë nuk mund t’i jap përgjigje, pasi e vendosin të tjerët, si qeveria dhe federata. Për të rifilluar na duhet një protokoll sigurie, pasi nuk mund të luajmë pa qenë të sigurt”.
“Erdha në Shqipëri sepse presidenti Demi ka një projekt shumë të mirë dhe për këtë arsye unë vendosa të vij në këtë kampionat. Më pëlqen mënyra se si punon ai, ka ide revolucionare dhe një shikim për të ardhmen”.
“Nota për sezonin e Partizanit? “Duhet të punosh çdo ditë që të formulosh lojën që duam. Unë jam i lumtur për punën që ka bërë ekipi. Më ka pëlqyer loja që ka bërë ekipi, pavarësisht se rezultatet nuk kanë qenë të mira”.
“Largimi i mundshëm? “Europa nuk është objektivi jonë, por shpresoj që të bëjmë mirë. Kërkoj kohë që futbollistët të bëjnë shumë stërvitje para rinisjes së kampionatit. Shpresoj të fitojmë anën fizike dhe më pas të rinisim”.
“Më pëlqen Shqipëria sepse është si qyteti im Napoli. Nuk më pëlqen mënyra se nuk merreni me fushën, por merreni me atë që ndodh jashtë”. u shpreh Sormani për “Supersport”.
