Shkalla e infektueshmërisë nga Covid-19 në Shqipëri është nën 1, që do të thotë se 1 person i infektuar infekton më pak se 1 person. Kjo u bë e ditur nga Eugena Tomini, Instituti i Shëndetit Publik, e cila u pyet lidhur me “R0” në Shqipëri, ose ndryshe shkalla e infektueshmërisë së një personi të prekur nga koronavirusi
“Aktualisht në situatën epidemiologjike, që nga fillimi i epidemisë, deri tani që flasim, është përllogaritur që R0 të jetë më e vogël se një,” tha Tomini.
Vende si Gjermania dhe Italia thonë se ky indeks në shtetet e tyre është afër 0.8.
E pyetur sa shtretër janë në dispozicion, Tomini tha se janë 310 shtretër në spitalet Covid, te Infektivi dhe Sanatoriumi.
“Ne kemi në gatishmëri me 120 dhe 190 shtretër dy spitalet Covid-19,” tha Tomini duke shtuar se po përgatiten edhe dy spitale të tjera Covid-19 në vend.
Tomini tha se janë 21 fëmijë të prekur nga virusi në vend që nga nisja e epidemisë.
“Që nga fillimi i epidemisë, ne kemi 21 pacientë të vegjël dhe asnjë prej tyre nuk është i hospitalizuar,” tha ajo.
Tomini theksoi se “epidemia në vend ka qenë e butë”.
