Shkalla e vdekjeve nga koronavirusi në Spanjë vazhdon të jetë në rënie.
Në 24 orët e fundit, Spanja ka raportuar 399 vdekje, shifër kjo më e ulët se ajo e së dielës prej 410 rastesh.
Në total 20,852 njerëz kanë humbur jetën teksa numri i të prekurve shkon mbi 200 mijë. Fatmirësisht raportohet se më shumë se 80,000 janë shëruar.
Kryeministri Pedro Sánchez pritet të kërkojë nga parlamenti të zgjasë bllokimin e vendit deri në 11 maj.
Ndërkohë Qeveria spanjolle do të propozojë që Bashkimi Evropian të krijojë një fond prej 1.5 trilionë eurosh për të ndihmuar vendet më të goditura nga koronavirusi, raporton gazeta El Pais.
Gazeta raporton se kryeministri Sanchez planifikon të bëjë një propozim zyrtar për kolegët e tij të BE gjatë një samiti që do të mbahet të enjten.
Fondi i propozuar nga qeveria spanjolle do të financohej nga borxhi i përhershëm i ngritur nga BE dhe paratë e dërguara në vende të ndryshme do të llogariten si transferime dhe jo borxhe.
