Duket se Koreja e Jugut po arrin të ngadalësojë përhapjen e virusit, përmes zbatimit të masave të forta parandaluese. Sot, shteti aziatik raportoi vetëm tetë raste të reja të prekurish me COVID-19.
Ndërkohë 8.042 pacientë të tjerë janë rikuperuar dhe janë liruar nga karantina, njofton Qendra për Kontrollin dhe Parandalimin e Sëmundjeve, ndërsa 12.243 persona të tjerë iu nënshtruan sot testit.
“Ne nuk duhet të ulim kujdesin derisa të shërohet pacienti i fundit i konfirmuar,” tha Presidenti i Koresë së Jugut, Moon Jae-in.
Presidenti Moon gjithashtu u ka kërkuar shtetasve të mbështesin qeverinë në kursimin e vendeve të punës dhe rigjallërimin e ekonomisë.
“Përpjekjet e qeverisë vetëm nuk janë të mjaftueshme në mes të një krize të rëndë ekonomike botërore. Solidariteti dhe bashkëpunimi publik është gjithashtu i nevojshëm për të ringjallur ekonominë tonë”, ‘tha ai.
Rënia e shpejtë e rasteve në Korenë e Jugut vjen teksa Japonia konfirmoi 568 pacientë të tjerë Covid-19.
Grafiku i mëposhtëm tregon se si ka rënë kurba e infektimeve nga 29 shkurti, kur ishte edhe kulmi i pandemisë me mbi 900 viktima, e deri më sot. Një shembull që duhet ndjekur edhe nga shtete të tjera…
Por çfarë masash mori Korea e Jugut?
Vetëm një shembull i vogël: Në Korenë e Jugut janë të paimagjinueshme rradhët e gjata në supermarkete, dyndja në mjetet e transportit publik apo thyerja e rregullave të tjera si distanca e sigurisë. Gjithashtu në vend është minimizuar në maksimum shërbimi i transportit publik. Stigma sociale për ata që kryejnë sjellje që mund të favorizojnë përhapjen e virusit është shumë më e theksuar sesa në vendet e tjera.
Në Korenë e Jugut qeveria mobilizoi edhe ushtrinë në zona të veçanta për të garantuar zbatimin e masave qeveritare. Një rol të madh luajti edhe një aplikacion që informon përdoruesit mbi përhapjen e infeksionit, distancat që duhen mbajtur nga zonat e kuqe, dhe zonat që duhen shmangur. Gjithashtu janë ngritur stacione të shumta testimi për përdoruesit e makinave.
Shteti i Azisë Lindore numëron deri tani 10.661 të infektuar dhe 234 viktima.
