Nga BoldNews.al
Një fond prej 7 miliard e 40 mln lekë do të përdoren nga Qeveria në atë që Kryeministri Edi Rama e ka cilësuar si paketa e dytë e ndihmës ekonomike në kuadër të përballimit të pasojave të shkaktuara nga kriza e Covid-19.
Paketa u bë publike pak ditë më parë nga Kryeministri Edi Rama, ndërsa tashmë ajo është kthyer në një vendim, që duhet të zbatohet nga ministri për Rindërtimin, Arben Ahmetaj, por edhe Ministria e Financave.
Boldnews.al ka siguruar të plotë vendimin, ku parashikohen detajet lidhur me kategoritë që përfitojnë pagesën prej 400 mijë lekë të vjetra, kriteret që duhet të plotësojnë, por edhe kategoritë që nuk përfitojnë.
Në vendim, parashikohet që punonjësit e bizneseve të mëdha që kanë humbur punën për shkak të krizës nga koronavirusi do të marrin 400 mijë lekë (të vjetra).
Gjithashtu përfitojnë edhe punonjësit e bizneseve të vogla të mbyllura që nuk morën ndihmë në paketën e parë, apo ato biznese të vogla që kanë qëndruar hapur, por që kanë punuar me xhiron minimale.
Në vendim përfshihen dhe përfitojnë edhe 10 mijë punonjës të turizmit, përfshi këtu edhe agjensitë turistike, të cilët nuk po punojnë aktualisht, dhe do të marrin një ndihmë prej 400 mijë lekësh (të vjetra).
Vendimi parashikon që punonjësit që punojnë në subjektet që tregtojnë fruta-perime, produkteve ushqimore, farmaceutike, apo ato që konsiderohen si profesione të lira si avokat, noter, arkitekt, inxhinier, farmacist, mjek i specializuar, laborant mjekësor, projektues, ekspert kontabël, nuk do të përfitojnë nga paketa e dytë.
Vendimi parashikon gjithashtu një afat 10 ditor që administrate tatimore ka në dispozicion nga momenti i aplikimit të subjekteve apo individëve që përfshihen në paketë, që të bëjnë verifikimet e nevojshme.
Një tjetër detaj është ai për punonjësit që figurojnë në më shumë se 1 listëpagesë, pra që mund të jenë të dypunësuar. Në këtë rast, vendimi parashikon përfitimin e vetëm një ndihme, apo pagese.
Gjithashtu nuk përfitojnë ndihmë, individët, paga e të cilëve përgjatë 2019, ka qenë mbi 20 mln lekë të vjetra në vit, organizatat jo-fitimprurëse, apo punonjësit e administratës dhe buxhetorëve.
Në vendim parashikohet gjithashtu që punonjësit e bizneseve me xhiro deri në 14 mln lekë, ose që konsiderohen të vogla, nuk përfitojnë nga kjo paketë e dytë e ndihmës ekonomike.
Për bizneset prodhuese, fasoneritë dhe atyre të turizmit do të jepet 150 milionë dollarë garanci sovrane ku nga Qeveria do të merret përsipër kosto e interesit.
Sipërmarrjet në sistemin bankar, telekomunikacionin dhe furnizimit me mall, që kanë pasur volum të rritur, pagesat e kësteve të tatim fitimit do të mund t’i bëjnë pas 30 shtatorit.
Për bizneset e turizmit, fasoneve, call center dhe bizneset e vogla deri në 14 milionë lekë në vit pagesat do të shtyhen përtej 31 dhjetorit të këtij viti, të kësteve të tatim fitimit.
