Pas 3 viteve te skuadra e Juventusit, Medhi Benatia, u largua nga bardhezinjtë në mënyrë kontroverse në janar të vitit 2019, në drejtim të Al Duhail.
Në një intervistë të dhënë për “Goal”, marokeni, ka deklaruar se largimi nga kampionët e Serie A erdhi si pasojë e mosmarrëveshjeve me Alegrin, trajner i Juventusit në atë kohë.
“Alegri është një trajner dhe një njeri i madh. Nuk pata problem me të apo me asnjë tjetër. Por ai më bëri premtime që në fund nuk i mbajti. Në parapërgatitjet që kryem në SHBA, trajneri më tha se do ta filloja titullar me Chiellini. Dhe Bonucci duhej ta fitonte vendin e tij. Leo është kampion, por pritej që unë të filloja dhe, mbase, në gabimin e parë, mund të kishte luajtur në vendin tim. Sa e drejtë ishte? Gjërat në atë moment ishin goxha mirë. Unë kisha shënuar gol në finalen e “Coppa Italia” dhe po flisnim për rinovimin e kontratës. Pas kësaj, unë e gjeta veten 4 herë radhazi në stol, pa luajtur asnjë minutë. Pastaj, si duket, Allegri kishte luajtur me mua. Unë fillova ta humbas durimin dhe i thashë se nuk do të luaja kurrë me Juven, derisa ai të ishte trajneri. Por, kam një marrëdhënie të jashtëzakonshme me klubin, ne akoma ndjehemi dhe jam i lumtur që kam mundur të punoj me ata njerëz”.
Më pas i pyetur për Cristiano Ronaldo-n, Benatia kishte vetëm lëvdata për yllin portugez madje duke e quajtur numrin 1 si futbollist dhe si njeri.
“Ai është numri 1 absolut, si futbollist dhe si person. Ai është shumë inteligjent, edhe jashtë fushe. Truri i tij është gjithmonë më i shpejtë se i të tjerëve. Jam i lumtur që jam shoku i tij. Gjithmonë i uroj atij më të mirat”.
