Ish-drejtori i spitalit të Sarandës që u arrestua për drogë, Florenc Llanaj ka rezultuar negativ në testin e analizave për Covid-19.
Ai iu nënshtrua testit pas kërkesës së Gjykatës së Posaçme drejtuar IShP-së.
Përmes avokatit të tij Arbër Hoxha, Llanaj kërkoi ndryshimin e masës së sigurisë nga “arest me burg” në “arrest shtëpie” dhe për këtë dha dy argumente:
Avokati i Llanajt shpjegoi se ai duhet të vendosë lente duke prekur sytë për shkak të problemeve me shikimin dhe rrezikon që në qeli të marrë koronavirusin duke qenë se ai ngjitet edhe përmes kontaktit. Krahas kësaj, avokati i Llanajt thekson se ky i fundit kishte shfaqur simptoma të dukshme si ato të koronavirusit si kollë, temperaturë, diarre dhe probleme të lehta me frymëmarrjen.
Pas kësaj kërkese, GjKKoK caktoi Institutin e Shëndetit Publik dhe spitalin e burgjeve që t’i kryejnë analizat e COVID-19.
Llanaj u arrestua si i dyshuar se bënte pjesë në grupin kriminal që merrej me trafikun e drogës nga Shqipëria në Greqi.
