Tre raste të reja me Covid 19 janë zbuluar në Fier. Raportohet se pacientët e rinj janë pjesë e të njëjtës familjeje, banorë të lagjes “Afrim i ri”.
Nuk dihet ende se si janë infektuar tre pacientët e rinj në Fier, pasi ato nuk kanë pasur histori udhëtimi, ose takime me persona që më parë janë konstatuar si pozitivë me koronavirus.
Mendohet se ato janë infektuar nga kontakte rastësore, çka do të thotë se do të jetë e vështirë për të zbuluar infektuesin e 3 anëtarëve të të njëjtës familjeje.
Me tre rastet e zbuluara sot, numri i të infektuarve me Covid-19 shkon në 35 persona, ndërsa prej disa ditësh zyrtarisht Ministria e Shëndetësisë nuk raportonte raste të reja me koronavirus nga ky qytet.
Për nga numri i të prekurve, Fieri renditet pas Tiranës, Shkodrës dhe Durrësit, që kanë edhe numrin më të lartë të të prekurve.
Më herët u raportua për infektimin e 3 rasteve të reja në Kukës, ku të prekur rezultojnë një mjek, një ndihmës mjek dhe një infermiere.
