Nga BoldNews.al
Kompania farmaceutike “Farma Net Albania” pritet që të marrë sot një “dhuratë” në vlerën 1.5 milionë euro nga strukturat e varësisë së Ministres së Shëndetësisë, Ogerta Manastirliu.
Më vonë gjatë ditës, Operatori Qendror i Kujdesit Shëndetësor, i drejtuar me komandim nga Mirela Cami, do të shpallë fituesit e tenderit për “blerje medikamentesh dhe pajisjesh mjekësore për qendrat shëndetësore të Shqipërisë, për periudhën 2020-2021-Marrëveshje Kuadër”.
“Boldnews.al” ka raportuar më parë se fituesi i këtij tenderi duket qartësisht se është i paracaktuar dhe procedura me fond limit rreth 1.5 milionë euro pritet të shkojë në favor të “Farma Net Albania”.
Arsyeja? “Farma Net Albania” ka ekskluzivitetin e një ilaçi kundër helmimit nga gjarpri, në morinë e medikamenteve të ngjashme, por që vartëset e Manastirliut kërkojnë të blejnë pikërisht atë që ka subjekti privat i paracaktuar.
Anti-Helmi, bileta fituese
Në 19 Mars 2020, Operatori Qendror i Kujdesit Shëndetësor shpalli, tenderin për blerje medikamentesh dhe pajisjesh mjekësore për të gjithë qendrat shëndetësore të vendit, për periudhën 2020-2021.
Autoriteti Kontraktor, nëpërmjet këtij tenderi, synon të furnizohet me një seri të gjatë mallrash, për të cilat ka vendosur edhe specifikimet përkatëse.
Pikërisht, në këto specifikime, qëndron edhe “fati” i kompanisë “Farma Net Albania”.
Operatori Qendror i Kujdesit Shëndetësor kërkon të blejë, ndër të tjera, një lloj medikamenti që quhet “Viper Venom serum” në flakonë 5 mililitra (ml).
Ky lloj ilaçi, i cili vepron kundër pickimit nga gjarpri, është i paregjistruar në Shqipëri dhe ai hyn në Shqipëri vetëm me autorizim të posaçëm të Ministrisë së Shëndetësisë.
Në Shqipëri, medikamentin “Viper Venom Serum” në flakonë 5 ml e qarkullon në Shqipëri vetëm “Farma Net Albania”, në bazë të një autorizimi të marrë rreth 2 vjet më parë nga Ministri i Shëndetësisë. Medikamenti i “Farma Net Albania” prodhohet në Serbi.
Në treg ka ilaçe të ngjashme kundër helmimit të gjarprit, të prodhuar në vende perëndimore dhe që, me shumë gjasë, janë më tepër cilësore se ai nga Serbia.
Por, Operatori Qendror i Kujdesit Shëndetësor, kërkon të blejë pikërisht atë që Ministria e Shëndetësisë ka autorizuar kompaninë “Farma Net Albania” që ta qarkullojë në vendin tonë.
Skema duket e qartë-fituesi i tenderit 1.5 milionë euro do të shpallet kompania që siguron të gjithë mallrat e kërkuara nga Operatori Qendror i Kujdesit Shëndetësor.
Duket qartë që asnjë kompani rivale e “Farma Net Albania” nuk mund të sigurojë të gjithë mallrat e kërkuar për këtë tender.
Autoriteti Kontraktor kërkon “viper venom serum” në flakonë 5 ml, mall që e ka ekskluzivitetin vetëm “Farma Net Albania”.
Në këto kushte, duket qartë që tenderi është i paracaktuar për shkak të kritereve specifike.
Këtë të Enjte pritet të luhet vetëm pjesa e fundit e “teatrit 1.5 milionë euro”-shpallja e fituesit të tenderit, ku të gjitha gjasat flasin se emri “me fat” do të jetë “Farma Net Albania”.
